ከውበት ፍካት ጥፋት
ምን ጠይቀህ ነበር በህይወትህ ዘመን?
በነዚያ በጨቅላ- በዳዴ ወራትህ- አጥንትህ ሲጠገን
የናት ጡት ሲያቆምህ ሲያሮጥህ ከወገን
ምን?
***--***--***
ምን ፈልገህ ነበር ነፍስህም ስትቃትት፤
ምን ተመኝታ ነበር የልብህስ መሻት
በህልምህ በ’ውንህ የወደፊት ምኞት…
በነዚያ ቀናቶች ባማሩ በጸዱ፤ በፈኩ ወራቶች
በምን ተተካኩ የሕይወት ምስጢሮች?
በምን?
***--***--***
አእምሮህ ጠይቆ ለመልስ ሲንከራተት
ምን አገኘህ ዛሬ ምን ፈለግህስ ትናንት…?
የጠየቅከው ቀመር ምን ሰጠህ ስሌቱ
የነፋሱ መንፈስ የጸሐይ መግባቱ?
***--***--***
ጥበብንስ ሽተህ መንፈስንም ክደህ
ከጥልቁ ውቅያኖስ ካውድማው ሸምተህ
ከድቅድቅ ጨለማው ከጉም ሽንቱ ዘግነህ
ስንት አተረፍክ ቁና ምኑን ሰፍረህ መጣህ…?
***--***--***
ህይወት ያለ ለከት
ፍቅር ካለ ጽናት…
ነገ ካለ ተስፋ ዛሬ ያለ እምነት
ምድር አንደው ግዙፍ ሕይወት እንደው ወረት
ጠፈር እንደው ሰፊ ፍቅርም ሲሆን ዘበት!
ሕይወት?
***--***--***
ምን ጠንክረህ ታገልህክ በጉብዝናህ ወራት
ምን አድነህ ገደልህክ በዝናህ ኩንትራት፡፡//ዝና ኩንትራት ነው!//
ምን ፈልገህ ቋጨህ በዘመን ዓመታት
ጥቋቁር ፀጉሮችህ ሲተኩ በሽበት
ነጫጮቹ ጥርሶች ጠቆሩ ከቅጽበት
***--***--***
የፈካው ፊትሽም ሲደበዝዝ ድንገት
ዋላ መሳይ ጡቶች ሲተኙ ወደንብርት…
***--***--***
የገደለው ጡንቻ የታገለው አጥንት
የሟሸሸው ቆዳ የጎበጠው ስሜት
ሕይወት?
***--***--***
በጊዜ ተዋረድ በዘመን ትሩፋት…
ምን እያየሽ መጣሽ በጸዳልሽ ፍካት
ምን ተምረሽ ቆየሽ በውበትሽ ጥፋት
***--***--***
ምን አትርፈህ መጣህ ከተጓዝከው ትላ-ንት?
ከሕይወት ፍካት
-ጥፋት!?
No comments:
Post a Comment