በአንድ ድምፅ የምንስማማበት ጀግናችን ማነው ?

ይህንን ጥያቄ ለዓመታት አንስቼዋለኹ፡፡ ከወዳጆቼ ጋርም ተነጋግሬበታለሁ፡፡ “የሚልየኔሙ” ጀግና ምናምን ተብሎ የተነገረለት አባ ታጠቅ ነው፡፡ ነግር ግን አባ ታጠቅ በደቡብ የኢትዮጵያ ክፍል ጥሩ ስም የለውም፡፡ ሚኒሊክም ያው፡፡ መለስ ዜናዊን የመረጠም ነበር፡፡

እንደ ኢትዮጵያ ላሉ አገራት አንድ ጀግና መምረጥ እጅግ ይከብዳል፡፡ ምክንያቱም በጎሳ ፣ በሃይማኖት እና በቋንቋ  ለተከፋፈለች እና አንዱ በአንዱ የበላይነቱን ለማሳየት በተቆራረጡበት እና በተዋጉበት አገር በአንድ ድምጽ የምንስማማበት ጀግና ማግኘት ከምላስ ላይ ጠጉር እንደመፈለግ ሆኖብኛል፡፡ ሰፊ እና ጥልቅ ሃሳብ/ውይይት የሚፈልግ ርዕስ ነው! ግራኝ አህመድም እኮ ጀግና ነው! ዮዲትም! ኢትዮጵያ ውስጥ እኮ ለዮዲት የክብር ወንበር የተቀመጠላትን ቦታ ጎብኝቻለሁ፡፡ ግራኝ አህመድም ለኢትዮጵያ ሙስሊሞች ታሪክ ሰሪ ጀግና ነው! ስለዚህ መሪ ጀግናን በዚህች አገር ለማግኜት እንቸገራለን፡፡

የኋላ ታሪካችንን ያላጠኑ ሰዎች መለስ ዜናዊን እንደ ጀግና አድርገው መለስ ሰጥተውኛል፡፡ ነገርግን እነ አጼ የሐንስ፣ ተክለጊዮርጊስ፣ ሚኒልክ፣ ቀ.ኃ.ሥ፣ መንግስቱ እና መለስ የቆሙባትን መሬት ለአንድነቷ መሰረት የሆነላት መይሳው ካሳ መሆኑን የሚክድ ኢትዮጵያዊ ያለ አይመስለኝም! ግን ከወሎዋ ንግስት ወርቂት ጋር በነበረው አለመግባባት ኦሮሞዎች ላይ ከፍተኛ ልዩነት ተፈጥሮ ስለነበር በደቡቡ የነበረው የኢትዮጰያ ህዝብ ካሳን እንደ ጀግና አድርጎ ለመቀበል ይከብደዋል፡፡

ለኔ ጀግና ግን ወደ ኋላ ታሪክ ሳይመልሰን አይቀርም፡፡ ዮቶር! የሙሴ አማት! ለእስራኤል ህዝብ ስልጣኔ መሰረት፣ የህዝብ አስተዳደር ትምህርትን የሰጠ፣ ሙሴን ያሰለጠነ ኢትዮጵያዊ ዮቶር ነው፡፡

ከዛም ንግስተ ሳባ

ከዛማ ህንደኬ

ከዛም ካሌብ

ከዛም ላሊበላ

ከዛም /ተክለ ሃይማኖት የዛጔን ስርወ መንገስት ወደ ሸዋው ያስታረቀ/

ከዛም ዘርዐ ያእቆብ

ከዛም ገላውዲዎስ

ከዛም ፋሲለደስ

ከዛም ታጠቅ

ከዛም ዮሐንስ

ከዛም ሚኒሊክ

ከዛም ኃይለስላሴ…

ለኔ ከመሪዎች እነዚህ ለዕጩነት ቢቀርቡ የምመርጠው ይኖረኛል፡፡ ሆኖም ከግን ሃይማኖቴ እና ቋንቋዬ ተጽዕኖ እንዳደረገብኝ ሳልደብቅ አላልፍም፡፡

ታሪክን ግን ከእነዚህ ነገሮች ውጭ ሆነን መመልከት አለብን! ይህ ከሆነ ጀግና ማግኘት አይከብደንም፡፡ ጀግናማ ሞልቷል!

ንግስት እሌኒ፣ ተዋበች/ የአጼ ቴዎድሮስ ሚስት/ ጣይቱ የተለየ ስፍራ አላቸው፡፡

መሪም ሚስትም የተጠቀሰላቸው ቴዎድሮስ እና ሚኒልክን አገኘን፡፡ ከሁለቱ ማንን ልምረጥ?

ሚኒልክን ደቡቡን ሲያቀና እነ ባላቻ ሳፎን፣ ፊታውራሪ ሐብተጊዮርጊስ ቢነግዴን አና ሌሎችን በማሳመን/በማሸነፍ/ አንድነትን ለማጠናከር ችሏል፡፡ ለነጮችም ዕፍረት ለጥቁር ህዝብም ኩራት የሆነውን አድዋን ያገኘነው በዚህ አንድነት ነበር! የመረብ ምላሽን እና የጅቡቲን ነገር እያነሱ ታሪክን ለማጣመመም የሚሞክሩ አሉና ምን መልስ አለህ ብትሉኝ

አሁንስ ስልጣን ላይ ያሉት መረብ ምልሽን መች ፈቱት! ይሆናል መልሴ፡፡

እነ ፊታውራሪ ገብርዬ እነ አሉላ አባ ነጋ፣ ስንት አርበኞች/ አብርሃ ደቦጭ አና ሞገስ አሰግዶም/ ፣ ራስ አበበ አረጋይ ኧረ ስንቱ…. ጀግና በበዛበት ሀገር ሁላችንንም የሚያስማማ አንድ ጀግና ማግኘት ሲከብድ እንዴት ያሳዝናል?

ማን ይን ጀግና?

ብዬ ሳሰላስል… ሳፈላልግ….

ክርስቶስ ብቻ ሆኖልኝ አረፈ!